Viðskipti innlent

Vill að ríkisstjórnin beiti sér fyrir því að Landsbankinn verði samfélagsbanki að þýskri fyrirmynd

Þorbjörn Þórðarson skrifar
Fyrrverandi formaður efnahags- og viðskiptanefndar Alþingis vill að ríkisstjórnin breyti Landsbankanum í samfélagsbanka. Hann segir að höfundar hvítbókar um framtíðarsýn fyrir fjármálakerfið hafi hafnað hugmyndinni um samfélagsbanka án rökstuðnings.

Ríkissjóður á hundrað prósent hlutafjár í Íslandsbanka og rúmlega 98 prósent í Landsbankanum. Í stefnuyfirlýsingu ríkisstjórnarinnar kemur fram að ríkisstjórnin vilji draga úr eignarhaldi ríkisins bönkunum en að ríkissjóður verði leiðandi fjárfestir í að minnsta kosti einum þeirra.

Í hvítbók um framtíðarsýn fyrir fjármálakerfið, sem unnin var að beiðni ríkisstjórnarinnar og kom út hinn 10. desember síðastliðinn, er lagt til að stjórnvöld hefji undirbúning að sölu bankanna. Þá er hugmyndinni um samfélagsbanka hafnað.

Vitnað er í álitsgerð Ásgeirs Jónssonar dósents í hagfræði. Þar segir: „Það er því erfitt að sjá hverju það ætti að skila fyrir eiganda eða viðskiptavini Landsbankans að breyta honum í samfélagsbanka/sparisjóð. Í besta falli yrði lítil sem engin breyting á starfsemi bankans, í versta falli væri verið að þvinga hann í úrelt rekstrarlíkan.“

Frosti Sigurjónsson fyrrverandi formaður efnahags- og viðskiptanefndar Alþingis vill að ríkisstjórnin breyti Landsbankanum í samfélagsbanka. Hann telur að höfundar hvítbókarinnar hafi hafnað hugmyndinni um samfélagsbanka án fullnægjandi rökstuðnings.

„Mér fannst í þessari hvítbók, sem var að koma núna út og átti að fjalla um framtíðarsýn fyrir fjármálakerfið, þar var þessari spurningu ekkert svarað. Það var ekkert fjallað um hana. Þá á ég við samfélagsbanka að þýskri fyrirmynd,“ segir Frosti.

Hver er munurinn á samfélagsbanka og sparisjóði? „Samfélagsbankar, eins og þeir eru í Þýskalandi, byggja á mörg hundruð ára fyrirkomulagi. Sparisjóðirnir íslensku, eins og þeir voru hér áður en þeim var breytt í viðskiptabanka og fjárfestingarbanka, voru svipaðir eins og þetta kerfi er í Þýskalandi. Bankar sem hugsa um sitt nærumhverfi. Þeir eru reknir fyrir samfélagið og ef það er einhver arður af rekstrinum þá rennur hann til samfélagsins. Þeir sinna smáum og meðalstórum fyrirtækjum, eru kjölfestan í þýsku efnahagslífi og njóta gríðarlegs trausts í Þýskalandi,“ segir Frosti.


Tengdar fréttir

Ekki sjálfgefið hvaða banka eigi að selja og hvernig

Kolbeinn Óttarsson Proppé þingmaður Vinstri grænna segir að borið hafi á þröngsýni í umræðu um hvítbók um framtíðarsýn fyrir fjármálakerfið. Hann segir engan veginn sjálfgefið hvaða banka eigi að selja og hvernig. Velta þurfi upp öllum kostum hvað fjármálakerfið varðar og spyr hvort rétt sé að sameina Landsbankann og Íslandsbanka.

Um 300 milljarðar gætu fengist fyrir Íslandsbanka og helmingshlut í Landsbankanum

Ríkissjóður gæti fengið tæplega 300 milljarða króna fyrir Íslandsbanka og helmingshlut í Landsbankanum, sé eingöngu miðað við bókfært virði eigin fjár. Fyrir það fé væri hægt að leggja innri leið Sundabrautar og byggja nýjan Landspítala við Hringbraut en samt eiga um 200 milljarða króna í afgang.

Vill láta kanna sameiningu Íslandsbanka og Landsbankans

Þingmaður Vinstri grænna vill að ríkisstjórnin kanni það til hlítar hvort hægt sé að sameina Íslandsbanka og Landsbankann áður en teknar verði ákvarðanir um sölu bankanna. Varaformaður efnahags- og viðskiptanefndar Alþingis segir slíkar hugmyndir óráð og hefur efasemdir að það myndi standast samkeppnislög.

Telur tímabært að hefja undirbúning á sölu bankanna

Framkvæmdastjóri Viðskiptaráðs Íslands segir tímabært að ríkisstjórnin hefji undirbúning á sölu á Íslandsbanka og hluta af Landsbankanum nú þegar hvítbók um framtíðarsýn fyrir fjármálakerfið liggur fyrir.






Fleiri fréttir

Sjá meira


×