Innlent

Hefur fengið 25 milljónir vegna aksturs og flugs

Sunna Kristín Hilmarsdóttir skrifar
Lilja Rafney Magnúsdóttir hefur verið þingmaður VG frá árinu 2009.
Lilja Rafney Magnúsdóttir hefur verið þingmaður VG frá árinu 2009. vísir/vilhelm

Lilja Rafney Magnúsdóttir, sem setið hefur á þingi fyrir Vinstri græn frá árinu 2009, hefur fengið samtals um 25 milljónir króna greiddar í kostnað vegna aksturs og flugs innan lands á síðustu tíu árum.

Þetta sýna gögn um launakostnað og aðrar greiðslur til þingmanna sem birtar voru á vef Alþingis í vikunni en gögnin ná aftur til ársins 2007.

Vísir fletti upp fjöldanum öllum af þingmönnum og skoðaði þingmenn sem eiga það sameiginlegt að vera með flugkostnað innan lands sem fer yfir fimm milljónir króna. Lilja Rafney er ein af þeim, með flugkostnað upp á 10.440.387 króna frá árinu 2009 til og með árinu 2018.

Á sama tímabili er Lilja Rafney með aksturskostnað á eigin bíl fyrir 6.698.517 krónur og ferðir með bílaleigubíl að upphæð 8.090.479 krónur en samtals gera þetta 25.229.383 krónur vegna aksturs og flugs innan lands.

Rétt er að geta þess að ekki er hægt að útiloka að aðrir þingmenn en þeir sem nefndir eru hér séu mögulega einnig með flugkostnað innan lands fyrir meira en fimm milljónir, þar sem Vísir hefur ekki flett upp hverjum einasta þingmanni í gögnunum. Þá ber einnig að hafa í huga að þingmenn hafa setið mislengi á Alþingi.

Þingmenn hafa flugkort í þeirra nafni sem virka eins og kreditkort til að kaupa sér flug innanlands. Þingmaður á eigin bíl fær greitt kílómetragjald og þarf hann að færa akstursbók. Ætlast er til að þingmenn noti bílaleigubíl noti hann bíl mikið til að ferðast á milli staða. Nánar um fyrirkomulagið neðst í fréttinni.

Eiga það allar sameiginlegt að vera landsbyggðarþingmenn

Valgerður Gunnarsdóttir, sem sat á þingi fyrir Sjálfstæðisflokkinn á árunum 2013 til 2017 fékk samtals 18.845.790 krónur greiddar vegna aksturs og flugs innanlands.

Fékk Valgerður 9.330.717 krónur vegna ferða á eigin bíl, 4.053.238 krónur vegna ferða með bílaleigubíl og svo alls 5.461.835 krónur fyrir flugferðir og fargjöld innan lands.

Bjarkey Olsen Gunnarsdóttir er flokkssystir Lilju Rafneyjar og hefur setið á þingi fyrir VG frá árinu 2013. Frá því ári og til með árinu 2018 hefur Bjarkey fengið samtals 16.401.266 krónur greiddar vegna kostnaðar við akstur og flug innan lands.

Hefur Bjarkey fengið alls 295.103 krónur vegna ferða á eigin bíl, 8.349.944 vegna ferða á bílaleigubíl og svo 7.756.219 krónur vegna flugferða og fargjalda innan lands.

Þórunn Egilsdóttir, þingkona Framsóknarflokksins, hefur síðan fengið alls 16.217.157 krónur  greiddar vegna aksturs og flugs innanlands frá því að hún settist á þing árið 2013.

Þar af eru 527.984 krónur vegna ferða á eigin bíl, 9.269.707 krónur vegna ferða á bílaleigubíl og 6.419.466 krónur vegna flugferða og fargjalda innan lands.

Þingkonurnar eiga það allir sameiginlegt að hafa setið á þingi fyrir landsbyggðarkjördæmi. Þær Valgerður, Bjarkey og Þórunn hafa allar verið þingmenn fyrir Norðausturkjördæmi og Lilja Rafney hefur setið á þingi fyrir Norðvesturkjördæmi. Samanlagður kostnaður við ferðir þeirra innanlands, á eigin bíl, bílaleigubíl eða flugi er 76.693.596 krónur.

Gögnin voru gerð opinber í vikunni. Vísir/Vilhelm

Um flugferðir innanlands af vef Alþingis
Þingmenn fá afhent flugkort sem er kreditkort í þeirra nafni. Þau eru miðuð við ferðir á staði þar sem flugferðir eru heppilegri valkostur en akstur og veita þau tiltekinn afslátt af fullu fargjaldi.

Þegar þingmaður ferðast með flugvél er jafnframt greitt fyrir leigubíl til og frá flugvelli samkvæmt reikningi þegar við á. Sama á við um annan ferðamáta, svo sem þegar ferðast er með ferju eða áætlunarbifreiðum.

Um akstur innanlands af vef Alþingis

Ferðir á eigin bifreið
Þegar alþingismaður ekur eigin bifreið er honum greitt km-gjald samkvæmt reglum ferðakostnaðarnefndar fjármálaráðuneytisins. Þingmaður færir akstursbók, sem skrifstofan lætur í té, til stuðnings endurgreiðslu fyrir akstur eigin bifreiðar.

Þegar alþingismaður notar einkabifreið til aksturs milli staða þar sem kostur er á flugi skal hann að jafnaði fá greitt sem nemur flugfari fyrir ferðina.

Ferðir með bílaleigubíl
Alþingismanni er að jafnaði heimilt að nota bílaleigubíl til fundarferða þegar vegalengd á fundarstað er a.m.k. 15 km (önnur leiðin) frá heimili eða starfsstöð.

Ef alþingismaður þarf að aka mikið vegna starfa sinna er miðað við að hann noti bílaleigubíl. Þegar fyrirsjáanlegt er að hann muni aka meira en 15.000 km ber honum að nota bílaleigubíl sem skrifstofa Alþingis lætur í té. Skrifstofan getur endurskoðað þennan kílómetrafjölda, t.d. í kjölfar útboðs á bílaleiguakstri. Alþingi greiðir allan rekstrarkostnað bifreiðarinnar samkvæmt nánari reglum skrifstofunnar.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.