Erlent

Eldflaug SpaceX lenti á sjó vegna bilunar

Samúel Karl Ólason skrifar
Þetta var í fyrsta sinn sem SpaceX notaði sömu eldflaugina í þriðja sinn.
Þetta var í fyrsta sinn sem SpaceX notaði sömu eldflaugina í þriðja sinn. SpaceX

Bilun kom upp í eldflaug SpaceX við geimskot í gær svo eldflaugin lenti á sjó í stað þess að lenda á jörðinni. Þetta var í þriðja sinn sem þessi tiltekna eldflaug var notuð til að koma farmi út í geim og tókst það þó lendingin hafi ekki heppnast. Þetta var í fyrsta sinn sem SpaceX notaði sömu eldflaugina í þriðja sinn. Að þessu sinni var eldflaugin notuð til að koma birgðum til Alþjóðlegu geimstöðvarinnar og var jólamáltíð geimfaranna þar á meðal.

Birgðirnar innihalda einnig 40 mýs og 36 þúsund orma, sem nota á við rannsóknir á öldrun og breytingum á vöðvum í þyngdarleysi. Áætlað er að Dragon-geimfari SpaceX nái til geimstöðvarinnar á laugardaginn.

Á leið aftur til jarðar kom þó upp bilun í vökvapumpu jafnvægisbúnaðar eldflaugarinnar svo hún snerist. Samkvæmt Elon Musk, stofnanda SpaceX, jafnað hreyfill eldflaugarinnar hana þó skömmu fyrir lendingu og virtist hún hafa lent í heilu lagi.

Eldflaugin virtist lenda upprétt og hefði hún mögulega náð að lenda á jörðinni.

Hans Koenigsmann, varaforstjóri SpaceX, segir eldflaugina sjálfa hafa greint vandann og það sé innbyggt í þær að lenda í vatni í tilvikum sem þessum. Markmiðið sé að tryggja öryggi fólks.

SpaceX hefur tólf sinnum lent á jörðinni áður og er þetta í fyrsta sinn sem slík lending misheppnast. Þá hafa lendingar á drónaskipum oft misheppnast. Allt í allt segir Koenigsmann að fyrirtækið hafi lent 32 eldflaugum í heilu lagi, sé eldflaugin í gær ekki talin með.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.