Viðskipti erlent

Pundið fær að kenna á Brexit-ólgu

Stefán Ó. Jónsson skrifar
Það er þungt í því pundið.
Það er þungt í því pundið. Getty/Tek Image
Gengi breska pundsins hefur fengið að kenna á ólgunni í þarlendum stjórnmálum í dag. Það sést til að mynda hér á Íslandi, en það sem af er degi hefur pundið veikst um næstum 2 prósent gagnvart krónunni. Nú kostar hvert pund um 159 krónur. Að sama skapi hefur pundið veikst gangvart bandaríkjadal sem nemur rúmlega 1,5 prósenti.

Vart þarf að fjölyrða um ástæðu fallsins, sem rakið er beint til nýjustu vendinga í Brexit-málum. Nokkrir innan ríkisstjórnar Theresu May hafa sagt af sér vegna samningsdraga sem lögð hafa verið fram vegna fyrirhugaðrar útgöngu Breta úr Evrópusambandinu. May hefur lagt alla sína pólitísku innistæðu í drögin og hefur hatrammur stuðningsmaður útgöngunnar boðað vantraust á forsætisráðherrann vegna samningsins sem barst frá Brussel.

Sjá einnig: Hart sótt að May á þinginu

Greinendur sem breskir fjölmiðla ræða við segja að fall pundsins í dag sé þannig skýr birtingarmynd efasemdanna um að May takist að fá samningsdrögin samþykkt á breska þinginu. Fyrrnefndar uppsagnir auki einnig líkurnar á því að greidd verði atkvæði um vantrauststillöguna.

Það um leið feli í sér auknar líkur á að boðað verði til nýrra þingkosninga með tilheyrandi óvissu. Þannig má ætla að gengi pundsins gæti fallið enn frekar - ekki síst ef spár munu gefa til kynna að „markaðs-óvinveitt og róttæk vinstri stjórn“ muni koma upp úr kössunum, eins og Jane Foley hjá Rabobank orðar það.

Vendingar dagsins eru að sama skapi sagðar gefa áhyggjum af samningslausu Brexit byr undir báða vængi, sem og vangaveltum um stöðu Theresu May sem leiðtoga Íhaldsflokksins. Pundið gæti jafnvel fallið um 3 til 4 prósent á næstunni ef May og bandamönnum hennar tekst ekki að kveða niður ólguna í flokknum á næstunni - eða ef þeim takist að senda skýr skilaboð um May muni takast að fá samþykki þingsins fyrir samningsdrögunum.


Tengdar fréttir

Hart sótt að May á þinginu

Nokkrir meðlimir ríkisstjórnar Theresu May hafa sagt af sér vegna samningsdraga varðandi brottför Bretland úr Evrópusambandinu sem May er að reyna að fá samþykkt.

Brexit-ráðherra segir af sér

Dominic Raab segir samvisku sína ekki leyfa sér að styðja drögin að brottför Bretlands úr Evrópusambandinu.






Fleiri fréttir

Sjá meira


×