Viðskipti erlent

Starfsmenn Google gengu út

Stefán Ó. Jónsson skrifar
Starfsstöðvar Google tæmdust víða í dag.
Starfsstöðvar Google tæmdust víða í dag. Getty/Niall Carson
Starfsmenn tæknirisans Google hafa yfirgefið vinnustaði sína í morgun í mótmælaskyni. Ástæðan er það sem þeir segja vera forkastanleg framkoma fyrirtækisins við konur.

Starfsmenninir krefjast þess að Google geri nokkrar grundvallarbreytingar á því hvernig fyrirtækið tekur á ásökunum um kynferðislega áreitni á vinnustaðnum. Þeirra á meðal er krafa um að mál af þessum toga verði ekki lengur leidd til lykta með samningaviðræðunum - sem myndi gera þolendum kleift að kæra gerendur til lögreglu.

Haft er eftir forstjóra Google, Sundar Pichai, á vef breska ríkisútvarpsins að hann sýni mótmælaaðgerðunum skilning. „Ég átta mig á þeirri reiði og þeim vonbrigðum sem mörg ykkar bera í brjósti,“ er Pichai sagður hafa skrifað í tölvupósti til starfsmanna. Í póstinum segist hann jafnframt lofa því að breytingar verði gerðar í þessum málum hjá Google á næstunni.

Þrátt fyrir að bág staða kvenna í tæknigeiranum hafi reglulega verið til umræðu á síðustu árum eru mótmælaaðgerðir dagsins einna helst raktar til nýlegra vendinga. New York Times greindi frá því í síðustu viku að Andy Rubin, sem bjó til Android-stýrikerfið, hafi fengið 90 milljónir dala þegar hann var rekinn frá Google árið 2014. Þrátt fyrir að honum hafi verið sparkað vegna ásakana um kynferðisbrot er hann sagður hafa verið „kvaddur sem hetja.“

Alls hefur Google rekið 48 manns vegna ásakana um kynferðislegt áreiti á síðustu tveimur árum. Þar á meðal voru þrettán háttsettir stjórnendur. Starfsmenn fyrirtækisins í Zürich, Lundúnum, Tókýó, Singapúr og Berlín eru meðal þeirra sem tóku þátt í mótmælaaðgerðunum í dag.


Tengdar fréttir

Google hefur rekið 48 á tveimur árum vegna áreitni

Þar á meðal voru þrettán háttsettir stjórnendur. Í bréfi til starfsmanna fyrirtækisins sem birt var í dag sagði Sundar Pichai, forstjóri Google, að fyrirtækið tæki hörðum tökum á áreitni.






Fleiri fréttir

Sjá meira


×