Viðskipti innlent

„4.900 krónu hamborgarinn“ kostar 3.800

Stefán Ó. Jónsson skrifar
Meint verðlagning á Gígur Restaurant Burger hefur farið fyrir brjóstið á fólki.
Meint verðlagning á Gígur Restaurant Burger hefur farið fyrir brjóstið á fólki. GIGUR RESTAURANT
Umtalaðasti hamborgari landsins þessa dagana er 1.100 krónum ódýrari en upphaflega var gengið út frá. Í umfjöllun vikublaðsins Mannlífs um verðlag í ferðaþjónustu á Íslandi er vitnað til Bandaríkjamanns sem „missti andlitið þegar hann sá hamborgara seldan á 4.900 krónur á hóteli á Suðausturlandi.“ Því er látið fylgja sögunni að Bandaríkjamaðurinn hafi ekki gengið að tilboðinu.

Allar götur síðan hefur borgarinn verið á milli tannanna á fólki, nú síðast rataði hann í leiðara Fréttablaðsins í morgun sem DV fjallaði svo um í kjölfarið. Þó virðist ákveðins misskilnings gæta í umræðunni um hamborgarann. Hann kostaði í raun ekki 4.900 krónur eins og upphaflega var talið - heldur 3.800.

Borgarinn fæst á veitingastaðnum Gíg sem finna má á Hótel Laka á Kirkjubæjarklaustri. Lilja Hrund Harðardóttir, hótelstjóri Laka, telur að umræðan einkennist af því að verið sé að bera saman epli og appelsínur. Borgarinn, sem ber heitið Gígur Restaurant Burger, sé enginn venjulegur hamborgari.

Enginn vegaborgari

Um sé að ræða 200 grömm af hreinu nautakjöti sem keypt er beint frá býli og unnið frá grunni á veitingastaðnum. Því væri nær að tala um steik í þessu tilfelli en hefðbundinn hamborgara. Þar að auki sé brauðið sem umlykur kjötið bakað á staðnum og hamborgarinn borinn fram með súrum gúrkum, cheddar-osti, rucola-káli, BBQ-sósu og aioli-majónesi. Meðlætið sé að sama skapi heimatilbúið.

Lilja segir því tvennt ólíkt að greiða uppsett verð, 3800 krónur, fyrir hamborgarann á Gíg og að borga 1200 krónur fyrir hefðbundinn, 90 gramma borgara sem fá má í öllum vegasjoppum landsins.

Aðspurð segist Lilja ekki heldur átta sig á því hvernig hið meinta 4.900 krónu verð er tilkomið, Gígur rukki til að mynda ekki fyrir breytingar á borgaranum eða viðbætur. Hún áætlar því að Bandaríkjamaðurinn hafi ætlað að panta drykk með réttinum. Það kunni að útskýra 1.100 krónu verðmuninn.

Lilja tekur undir þær áhyggjur fólks að víða sé verið að okra í íslenskri ferðaþjónustu. Hins vegar þykir henni umræddur hamborgari ekki eiga heima í þeirri umræðu. Þetta sé enginn venjulegur hamborgari.


Tengdar fréttir

Græðgi

Sú var tíð að Íslendingar voru annálaðir fyrir gestrisni enda lögðu þeir upp úr henni.






Fleiri fréttir

Sjá meira


×