Viðskipti innlent

Landsbankinn greiðir 9,5 milljarða í arð

Stefán Ó. Jónsson skrifar
Næstum öll greiðslan rennur í ríkissjóð.
Næstum öll greiðslan rennur í ríkissjóð. Vísir/stefán
Landsbankinn greiddi í gær 9,5 milljarða króna í sérstaka arðgreiðslu. Um 99,7% af arðgreiðslum ársins renna í ríkissjóð. Bankinn hefur þar með greitt 24,8 milljarða króna í arð árinu 2018 og alls nema arðgreiðslur bankans um 131,7 milljörðum króna frá árinu 2013.

Fram kemur í tilkynningu frá Landsbankanum að tillaga bankaráðs um arðgreiðslur hafi verið samþykkt á aðalfundi bankans þann 21. mars síðastliðinn. Annars vegar var um að ræða 15.366 milljóna króna arð vegna rekstrarársins 2017 og var sú greiðsla innt af hendi 28. mars síðastliðinn. Hins vegar er um að ræða sérstakan arð til hluthafa að fjárhæð 9.456 milljónir króna sem var á gjalddaga 19. september 2018.

Landsbakinn greiddi einnig 24,8 milljarða króna í arð í fyrra.

Í tilkynningunni segir jafnframt að eigið fé Landsbankans hafi verið 232,1 milljarðar króna 30. júní og eiginfjárhlutfallið var 24,1%. Hafði þá verið gert ráð fyrir áhrifum arðgreiðslna á árinu 2018.


Tengdar fréttir






Fleiri fréttir

Sjá meira


×