Fótbolti

Sara Björk bikarmeistari með Wolfsburg

Ástrós Ýr Eggertsdóttir skrifar
Leikmenn Wolfsburg fögnuðu bikarmeistaratitli í dag
Leikmenn Wolfsburg fögnuðu bikarmeistaratitli í dag vísir/getty
Sara Björk Gunnarsdóttir og stöllur hennar í þýska liðinu Wolfsburg unnu í dag þýska bikarinn í fótbolta og eru því tvöfaldir meistarar heima fyrir.

Wolfsburg hafði betur gegn Bayern München 3-2 í vítaspyrnukeppni eftir að hvorugu liði hafði tekist að skora eftir venjulegan leiktíma og framlengingu. Sara Björk var allan tímann á vellinum fyrir Wolfsburg en hún var ekki ein af þeim sem tók víti í vítaspyrnukeppninni.

Fyrr í mánuðinum varð Wolfsburg Þýskalandsmeistari og Sara Björk og félagar geta fullkomnað þrennuna í næstu viku þegar liðið mætir Lyon í úrslitaleik Meistaradeildar Evrópu.

Úrslitaleikurinn fer fram á fimmtudaginn og verður hann í beinni útsendingu á Stöð 2 Sport frá 15:30.




Fleiri fréttir

Sjá meira


×