Innlent

Algjört öngþveiti við Hakið í morgun vegna óveðursins

Sunna Kristín Hilmarsdóttir skrifar
Frá aðstæðum í þjóðgarðinum á Þingvöllum í dag en stormur hefur geisað á Suður-og Suðausturlandi með tilheyrandi ófærð í landshlutunum.
Frá aðstæðum í þjóðgarðinum á Þingvöllum í dag en stormur hefur geisað á Suður-og Suðausturlandi með tilheyrandi ófærð í landshlutunum. vísir/einar

Um 150 manns eru nú fastir í þjóðgarðinum á Þingvöllum vegna ófærðar en nánast allir vegir á Suðurlandi eru nú lokaðir vegna stormsins sem þar hefur geisað í dag. Einar Á. E. Sæmundsen, þjóðgarðsvörður, segir að landverðir hafi í dag verið úti um allt í þjóðgarðinum að leita að fólki, aðstoða það og tryggja að það færi sér ekki að voða.

„Það var alveg ljóst í gær miðað við veðurspána að það yrði einhver vandræði hérna hjá okkur vegna þess að um leið og fólk fer hérna yfir þá lokast það inni, og um leið og það er komið til okkar þá lokast það inni í þjóðgarðinum. Við erum með á milli 100 og 150 manns sem eru í gestastofunni og þjónustumiðstöðinni,“ segir Einar.

Meðal annars þurfti að aðstoða ökumenn sem höfðu fest bíla sína úti í Þingvallahrauni og vegfarendur lentu einnig  í vandræðum á bílastæðinu við Hakið.

„Það var bara algjört kaos uppi á Haki í morgun vegna þess að það skóf jafnóðum inn í bílastæðin og á veginn,“ segir Einar og bætir við að það hafi verið standandi röð af ferðamönnum á Þingvöllum strax klukkan 9 í morgun.

Fjöldi ferðamanna kemst ekki leiðar sinnar frá þjóðgarðinum á Þingvöllum vegna ófærðar og veðurs. vísir/einar

Hefði átt að loka vegum fyrr
„Það var mjög slæmt veður hérna í morgun en þeir ná yfir heiðina áður en lokunin verður. Í raun og veru, við svona veðurupplýsingar, ætti bara að loka klukkan 7 eða 8 því menn eru bara að lenda í skaðræðisveseni hérna,“ segir Einar.

Hann segir ferðamenn hafa fest bíla sína úti um allan þjóðgarð og þó að Vegagerðin og starfsmenn þjóðgarðsins standi sig í að moka og ryðja vegi þá verði einfaldlega ekki ráðið við ástandið í veðri eins og verið hefur í dag.

„Það voru til dæmis fjórir bílar fastir hérna á leiðinni upp á Gjábakka og við erum að koma þeim í öruggt skjól í þjónustumiðstöðinni. Við erum í raun bara að bíða eftir að menn opni veginn og þá getur þessi floti haldið áfram, hvert sem hann er að fara. Flestir vilja nú bara halda áfram og sjá Gullfoss og Geysi en við erum að ítreka við fólk að það er ekki alveg að fara að gerast.“

Menn reyna allt til að ná góðri „selfie“
Aðspurður hvort ekki sé alveg ófært innan þjóðgarðsins sjálfs segir Einar svo vera.
„En menn reyna allt til að ná góðri „selfie,““ segir Einar.

Einar segir ágætlega fara um ferðamennina; einhverjir bíði í bílum sínum úti, aðrir inni. Spurður út í hvort ferðalangarnir hafi verið eitthvað pirraðir á veðrinu segir hann svo ekki vera.

„Nei, ég myndi nú ekki segja það þannig. Ef einhver er pirraður þá segjum við honum bara að fá sér kaffi.“

Óljóst er hvenær vegirnir opna en Einar á von á því að það verði á næstu klukkutímum.
 
Upplýsingar um færð og aðstæður á vegum má finna hér fyrir neðan:
Vegirnir um Hellisheiði, Þrengsli, Sandskeið, Mosfellsheiði og Lyngdalsheiði eru lokaðir. Þjóðvegur 1 frá Hvolsvelli að Vík er lokaður. Búið er að loka Biskupstungnabraut og frá Laugavatni að Gullfoss og einnig Krýsuvíkurleið.
 
Vegirnir um Hafnarfjall, Brattabrekku, Fróðárheiði og á milli Ólafsvíkur og Grundarfjarðar eru lokaðir.

Einnig er lokað um Öxnadalsheiði, Víkurskarð, Hólasand, Mývatns- og Möðrudalsöræfi og Fjarðarheiði.

Opnanir
Opið er á milli Hveragerðis og Selfoss og einnig um Suðurstrandaveg.
 
Búið er að opna veginn frá Steinum og austur úr.

Súðavíkurhlíð
Súðavíkurhlíð snjóflóð: Óvissurstigi er lýst yfir í dag miðvikudag kl. 14:00, veginum verður lokað kl 17:00.

Færð og aðstæður
Þæfingsfærð og skafrenningur er á Kjalarnesi og undir Ingólfsfjalli.

Á Suðvestur- og Suðurlandi er hálka, snjóþekja eða þæfingur og skafrenningur á flestum leiðum. Þæfingsfærð og skafrenningur er frá Hvolsvelli að Þjórsá. Ófært er á Kjósarskarðsvegi og í Landeyjum.

Á Vesturlandi er snjóþekja, hálka eða þæfingur á flestum leiðum og skafrenningur. Þungfært og mjög hvasst er við Hafursfell. Ófært og óveður er víðast hvar á Snæfellsnesi.

Á Vestfjörðum er snjóþekja, hálka eða þæfingur. Fjallvegir á sunnanverðum Vestfjörðum eru ófærir og beðið með mokstur.  Beðið er með mokstur í Ísafjarðardjúpi, á Steingrímsjarðarheiði, Þröskuldum. Ófært er á Gemlufallsheiði.

Á Norðurlandi er hálka eða snjóþekja og skafrenningur og farið að hvessa.

Á Austurlandi er hálka eða snjóþekja. Ófært og óveður er á Vatnsskarði eystra. Hálka eða krapi er frá Egilsstöðum og með ströndinni.


Tengdar fréttir

Lægð dagsins annars eðlis

Alls ekkert ferðaveður verður syðst á landinu í dag, frá Hvolsvelli og austur fyrir Öræfi. Á þeim slóðum getur slegið í ofsaveður þegar hæst stendur



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.