Fótbolti

Guðjón og Hermann nálgast úrslitakeppni

Anton Ingi Leifsson skrifar
Guðjón í leik með Kerala.
Guðjón í leik með Kerala. vísir/isl
Kerala Blasters með Guðjón Baldvinsson í broddi fylkingar vann 1-0 útisigur á NorthEast United í indversku deildinni í knattspyrnu í dag.

Eina mark leiksins gerði fyrrum varnarmaður Manchester United, Wes Brown, með skalla eftir hornspyrnu, en markið kom á 24. mínútu leiksins.

Guðjón spilaði allan leikinn, en hann er á láni hjá félaginu þangað til Pepsi-deildin hefst í vor. Hann komst í gott færi eftir sendingu frá Berbatov, en lét verja frá sér.

Liðið hefur ekki tapað með Guðjón innanborðs, en hann gekk í raðir liðsins í lok janúar.

Liðið er nú í fimmta sætinu, stigi á eftir Jamshedpur, en fjögur efstu sætin gefa þáttökurétt í úrslitakeppni þar sem er leikið undanúrslit og svo úrslit. Kerala á tvo leiki eftir, en Jamshedpur á þrjá.

Hermann Hreiðarsson er aðstoðarþjálfari liðsins.




Fleiri fréttir

Sjá meira


×