Viðskipti

Við getum sýnt heiminum hvernig á að nýta jarðhita

Kristján Már Unnarsson skrifar
Lúðvík S. Georgsson, skólastjóri Jarðhitaskóla Sameinuðu þjóðanna.
Lúðvík S. Georgsson, skólastjóri Jarðhitaskóla Sameinuðu þjóðanna. Stöð 2/Sigurjón Ólason.

Risasamningar Reykjavík Geothermal við Eþíópíumenn eru stórkostlegt tækifæri fyrir Íslendinga, að mati skólastjóra Jarðhitaskóla Sameinuðu þjóðanna. Fyrrverandi nemendur skólans, sem lært hafa á Íslandi, gegna nú margir lykilstöðum í jarðhitavæðingu þróunarlanda. Í fréttum Stöðvar 2 var rætt við Lúðvík S. Georgsson, skólastjóra Jarðhitaskóla Sameinuðu þjóðanna, og tvo nemendur skólans. 

Frá árinu 1979 hafa alls 670 nemendur frá 60 löndum úr öllum heimsálfum sótt Jarðhitaskóla Sameinuðu þjóðanna, sem starfræktur er hjá Orkustofnun við Grensásveg. Nemendahóparnir hafa verið 40 talsins á tæpum 40 árum. Þar gleðja fréttir af risasamningum Reykjavík Geothermal við stjórnvöld í Eþíópíu. 

„Þetta er náttúrlega stórkostlegt tækifæri sem við Íslendingar fáum þarna. Við erum búnir að bíða eftir þessu í nokkur ár að Reykjavík Geothermal nái að klára þessa samninga. Þetta er brautryðjandi samningur þar og þeir eru oft erfiðir. En nú er þetta í höfn,“ segir Lúðvík. 

Jarðhitaskólinn hefur kennt fjölda nemenda frá Eþíópíu. 

„Það er það land í Afríku, fyrir utan Kenýa, sem við höfum stutt best við. Þetta þýðir auðvitað það að í framtíðinni þarf Jarðhitaskólinn að gera ennþá meira fyrir Eþíópíu,“ segir Lúðvík.

Samuel Ng'ang'a, borverkfræðingur frá Kenýa, er í meistaranámi í jarðhitaborun. Stöð 2/Sigurjón Ólason.

Í skólanum hittum við á tvo nemendur sem báðir eru í meistaranámi, en alls hafa um sextíu nemendur Jarðhitaskólans stundað meistara- og doktorsnám í samstarfi við Háskóla Íslands og Háskólann í Reykjavík. 

Samuel Ng‘ang‘a borverkfræðingur frá Kenýa er að læra um jarðhitaboranir í gegnum ÍSOR. 

„Við lærum svo mikið. Ég var hérna á sex mánaða námskeiði 2014. Það var hvatning fyrir mig að koma aftur í meistaranám,“ segir Samuel. 

Irma Khoirunissa umhverfisfræðingur kemur frá Indónesíu til að læra um hvernig Íslendingar taka á brennisteinsmengun frá jarðhitavirkjunum og hyggst miðla þeirri þekkingu áfram til síns heimalands. 

„Í Indónesíu eru engar reglur um hvernig eigi að taka á útblæstri, til dæmis vegna fólks sem býr nálægt virkjunum. Hérna á Íslandi hafa stjórnvöld ákveðna stefnu,“ segir Irma.

Irma Khoirunissa, umhverfisfræðingur frá Indónesíu, er að læra um hvernig Íslendingar taka á brennisteinsmengun frá jarðhitavirkjunum. Stöð 2/Sigurjón Ólason.

Skólastjóri Jarðhitaskólans segir fjölda fyrrverandi nemenda nú í áhrifastöðum við jarðhitanýtingu í sínum heimalöndum. Hann nefnir sem dæmi stórt hitaveituverkefni í Kína. Þar að baki séu fyrrverandi nemendur skólans í lykilstöðum, bæði innan stjórnkerfisins og þess fyrirtækis sem leiði framkvæmdirnar. 

Aðrar þjóðir horfi til Íslands þegar komi að nýtingu jarðhitans. 

„Við höfum alla þekkinguna og getum virkilega sýnt heiminum hvernig á að standa að nýtingu jarðhitans,“ segir Lúðvík. 

Hér má sjá frétt Stöðvar 2:
 


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Mesta hækkun dagsins


Félag
Br.%
Fjöldi
Velta*
ICEAIR
2,81
45
579.947
HAGA
1,26
17
196.221
GRND
0,99
9
132.365
EIM
0,78
12
143.123
SIMINN
0,7
10
227.493

Mesta lækkun dagsins


Félag
Br.%
Fjöldi
Velta*
N1
-1,2
4
96.398
SKEL
-1,07
4
109.235
MARL
-0,85
24
635.463
REITIR
-0,44
6
11.612
REGINN
-0,19
8
118.204