Viðskipti innlent

Björgvin Ingi hættir hjá Íslandsbanka

Daníel Freyr Birkisson skrifar
Björgvin Ingi sinnti starfi framkvæmdastjóra viðskipta og þróunar hjá Íslandsbankanum.
Björgvin Ingi sinnti starfi framkvæmdastjóra viðskipta og þróunar hjá Íslandsbankanum. Íslandsbanki
Björgvin Ingi Ólafsson, framkvæmdastjóri viðskipta og þróunar hjá Íslandsbanka, hefur sagt upp störfum. Staðfesti Björgvin tíðindin í samtali við Vísi en greindi upphaflega frá á Facebook-síðu sinni.

Hann var ráðinn inn í framkvæmdastjórn bankans fyrir þremur árum síðan og segir í færslunni að vonast hafi verið eftir því að hann „yrði afl til breytinga“. Hann telur sig hafa staðið undir þeim væntingum. Skipulagi bankans hafi undanfarið verið gjörbreytt og hann nú tilbúinn til þess að takast á við þær áskoranir sem framtíðin ber í skauti sér.

Nú sé hins vegar komið að tímamótum og kveðst hann spenntur fyrir komandi tímum. Hann vill þó ekki gefa upp hvað tekur við.

„Ég skil stoltur við betri banka en ég kom inn í. Ég er glaður að hafa tekið þátt í þessu og hlakka til að takast á við nýja og spennandi hluti á frábæru ári 2018. Meira um það síðar,“ segir hann.

Áður fyrr starfaði Björgvin Ingi sem fjármálastjóri Meniga og þar áður hjá ráðgjafafyrirtækinu McKinsey & Company. Þá hefur hann víðtæka reynslu af bankastarfsemi og var meðal annars starfsmaður Íslandsbanka frá 2000-2005. Björgvin er með MBA gráðu frá Kellogg School of Management og B.Sc. gráðu í hagfræði frá Háskóla Íslands.






Fleiri fréttir

Sjá meira


×