Bíó og sjónvarp

Ný stikla úr teikni­myndinni Lói – þú flýgur aldrei einn

Samúel Karl Ólason skrifar
Plakat myndarinnar. Hún verður frumsýnd í byrjun febrúar.
Plakat myndarinnar. Hún verður frumsýnd í byrjun febrúar.
Vísir frumsýnir hér nýja stiklu úr íslensku teiknimyndinni Lói - þú flýgur aldrei einn.

„Það er farið að styttast verulega í frumsýningu á þessu risavaxna verkefni sem hafin var vinna við fyrir að verða fimm árum síðan. Eftir langan og strangan þróunar- og fjármögnunarferil hófst framleiðsla myndarinnar á fullu fyrir um tveim árum hér á Íslandi og í Belgíu. Að baki eru um 140 mannár og nú sjáum við til lands í þessu risavaxna verkefni og hlökkum til frumsýningar í byrjun febrúar.“ segir Hilmar Sigurðsson, framleiðandi teiknimyndarinnar.

Myndin fjallar um lóuungann Lóa, sem er ófleygur að hausti þegar farfuglarnir halda suður á bóginn. Lói þarf að lifa af harðan vetur, grimma óvinu og takast á við sjálfan sig til að sameinast ástinni sinni að vori.

Hér fyrir neðan má sjá stikluna.

Kvikmyndin hefur verið seld til sýninga í kvikmyndahúsum í yfir 60 landa á heimsvísu, en ARRI Media selur. Myndin er framleidd af GunHil en aðstandendur þess fyrirtækis voru framleiðandi og leikstjóri á Hetjur Valhallar - Þór, fyrstu íslensku teiknimyndarinnar í fullri lengd og er mest sótta íslenska kvikmyndin utan landsteinanna.

Framleiðslukostnaður Lóa – þú flýgur aldrei einn er um einn milljarður króna og hún er unnin í samframleiðslu með belgíska teiknimyndafyrirtækinu Cyborn. Sena dreifir myndinni á Íslandi.

Vandað til verka

Leikstjóri myndarinnar er Árni Ólafur Ásgeirsson, söguna skrifaði Friðrik Erlingsson og Gunnar Karlsson er aðstoðarleikstjóri og hönnuður útlits. Matthías Matthíasson og Rakel Björgvinsdóttir hrepptu hlutverk Lóa og Lóu eftir umfangsmikla hlutverkaleit þar sem nær 200 ungmenni komu í prufutökur. Meðal annarra leikara í íslensku útgáfunni eru Ólafur Darri Ólafson, Arnar Jónsson, Þórunn Erna Clausen og Hilmar Snær Guðnason.

Tónlistin er í höndum Atla Örvarssonar og er umfangsmesta tónlistarverkefni sem ráðist hefur verið í fyrir kvikmynd hér á landi.

Margir ólíkir listamenn standa á bak við teiknimyndina og vandað er til verka því er óhætt að segja að tilhlökkunin fyrir því að myndin líti dagsins ljós sé mikil, en hún hefur verið í vinnslu í hart nær 5 ár.


Tengdar fréttir

Með ýmislegt á prjónunum

Atli Örvarsson tónskáld hefur samið tónlist fyrir ótalmargar kvikmyndir og sjónvarpsþætti. Nú síðast sá hann um tónlistina fyrir kvikmyndina The Hitman's Bodyguard, eina sá vinsælustu í dag.

Ein dýrasta mynd sem gerð hefur verið á Íslandi

Hilm­ar Sig­urðsson og Gunn­ar Karls­son, frum­kvöðlar í tölvu­teikni­mynda­gerð á Íslandi, framleiða teiknimyndina Lói – þú flýgur aldrei einn. Hugmyndin að handritinu kviknaði þegar Friðrik Erlingsson handritshöfundur bjó á Eyrarbakka og rölti um í fjörunni, en þetta mun vera ein dýrasta mynd sem gerð hefur verið á Íslandi til þessa.






Fleiri fréttir

Sjá meira


×