Tónlist

Vill ekki setja tónlistina í box

Sigríður Inga Sigurðardóttir skrifar
Jónína ætlar að flytja eigin lög í Kaldalóni í Hörpu í kvöld.
Jónína ætlar að flytja eigin lög í Kaldalóni í Hörpu í kvöld. Vísir/Stefán
Tónlistarkonan Jónína Ara heldur útgáfutónleika í Kaldalóni í Hörpu í kvöld kl.20. Hún ætlar að flytja lög af nýju plötunni sinni, Remember.

Jónína Ara hefur fengist við tónlist um alllangt skeið og gítarinn er aldrei langt undan. Remember er önnur platan sem Jónína sendir sér en þetta er í fyrsta sinn sem hún kemur fram í Hörpu.

„Ég samdi öll lög og texta á plötunni sjálf og verð með einvala lið með mér á sviðinu. Mér finnst fremur erfitt að setja tónlistina mína í ákveðið box en á plötunni má finna þjóðlagatónlist og blús, kántrí og rokk,“ segir Jónína, sem fjármagnaði plötuútgáfuna með söfnun á Karolina Fund. „Ég hef alltaf haft unun af tónlist. Ég er fædd og uppalin á Hofi í Öræfasveit og í sveitinni var ekki hægt að velja um eitthvert ákveðið hljóðfæri til að læra á. Ég fékk þó tækifæri til að læra á þau hljóðfæri sem voru til á heimilinu; gítar, harmóníku og píanó.“

Trúbadorakeppnin kom öllu af stað

Jónína fór með sigur af hólmi í trúbadorakeppni Rásar 2 árið 2003 og það varð til þess að hún ákvað að reyna frekar fyrir sér í tónlist.

„Til gamans sendi ég lag inn í keppnina og það var auðvitað mjög gaman að vinna. Það var mikil hvatning og varð til þess að ég ákvað að fara til Danmerkur í tónlistarnám. Fyrst fór ég á gítarbraut og síðan á tæknibraut þar sem ég lærði hljóðblöndun fyrir stúdíó og tónleikahald. Ég vildi líka vita hvernig tæknin virkaði og það var bæði áhugavert og lærdómsríkt,“ rifjar Jónína upp.

Allir vilja slá í gegn

Þaðan lá svo leiðin til Los Angeles í þriggja ára tónlistarnám við Musicians Institute. Jónína lauk diplóma í Associate in Art and Performance með Independent Artist sem aukafag. Hún segir Los Angeles mjög líflega og skemmtilega borg en þar snúist þó allt um að koma sér á framfæri. „Það er mikil keppni í gangi og allir að reyna að slá í gegn. Auðvitað er mikil tenging við tónlist í LA, ég söng mikið, samdi tónlist og hlustaði á tónlist en ég kom líka heim á hverju ári til að vinna og ná góðu jarðsambandi.“

Að námi loknu tók við þriggja vikna tónleikaferð um Bandaríkin. Jónína ók á milli staða með tjald í skottinu og gítarinn í aftursætinu. „Um leið og ég var komin út fyrir LA var fólk svo opið og fannst gaman og spennandi að hitta einhvern frá öðru landi sem kom að spila. Það var yndislegt og mjög gefandi. Ég flutti svo heim aftur en ári síðar fór ég aftur út og túraði með sænskri vinkonu minni um alla vesturströnd Bandaríkjanna.“ 

Evrópuferð í spilunum

Hér heima hefur Jónína víða komið fram. Undanfarin fjögur ár hefur hún spilað „off venue“ á Airwaves tónlistarhátíðinni og ætlunin er að spila á hátíðinni í ár.

„Ég er að skipuleggja túr um Evrópu á næsta ári og svo er stefnan að koma fram hér heima en það verður ekki fyrr en eftir áramótin. Mér finnst gaman að vera frjáls og gera það sem mér dettur í hug. Ég viðurkenni alveg að það er ekki alltaf auðvelt fyrir konur að koma sér áfram innan tónlistarbransans en ég hef trú á sjálfri mér og gaman af því sem ég er að gera svo ég læt það ekki stöðva mig.“






Fleiri fréttir

Sjá meira


×