Bíó og sjónvarp

Frumsýna 150 ára sögu

Haraldur Guðmundsson skrifar
Það er gaman að sýna að hugsjónirnar voru ekkert öðruvísi í upphafi en þær eru í dag, segir Elsa.
Það er gaman að sýna að hugsjónirnar voru ekkert öðruvísi í upphafi en þær eru í dag, segir Elsa. Vísir/Hanna
„Auðvitað er vandi að velja úr tímabili sem nær yfir 150 ár. Það var aftur á móti mikilvægt að draga fortíðina inn í nútíðina því um tíma var Reykjavík borg byggð að mestu af iðnaðarmönnum,“ segir Elsa Haraldsdóttir, formaður Iðnaðarmannafélagsins í Reykjavík, um nýja heimildarmynd um félagið sem frumsýnd verður í Laugarásbíói í dag.

Iðnaðarmannafélagið fagnaði 150 ára afmæli þann 3. febrúar síðastliðinn. Af því tilefni var ráðist í gerð heimildarmyndarinnar sem Halldór Árni Sveinsson hefur haft umsjón með. Þar er saga félagsins rakin í máli og myndum.

„Við byrjuðum afmælisárið á að tendra lýsingu á styttu Ingólfs Arnarssonar á Arnarhóli, á sjálfan afmælisdaginn, sem var gjöf frá félaginu árið 1924. Í framhaldinu komu stjórnir norrænu systurfélaganna okkar hingað sem gestir á norrænum fundi. Síðan var haldin hátíð þar sem við veittum ungum nýsveinum viðurkenningar fyrir afburðagóð sveinspróf. Mér þykir óskaplega vænt um að við skyldum ráðast í þessa heimildamynd. Það er gaman að sýna að hugsjónirnar voru ekkert öðruvísi í upphafi en þær eru í dag. Þær voru að efla stéttarfélögin, byggja skóla, banka og fleira. Það erum að draga fram með þessari mynd.“

Guðjón Friðriksson, sagnfræðingur og rithöfundur, leikur að sögn Elsu, mikilvægt hlutverk í myndinni sem sögumaður. Hann þekki Reykjavík út og inn og hafi því verið kjörinn til þess að leiða áhorfendur í gegnum sögu félagsins. Bíósýningin í dag er sú eina sem ákveðin hefur verið.

„Þetta er 60 mínútna mynd en það er búið að taka upp mikið af efni sem hefði verið gaman að koma fyrir. Vinnslan var í höndum handritshöfundarins Halldórs Árna Sveinssonar. Við höfum mikinn áhuga á að koma myndinni inn í skólana og Ríkissjónvarpið og þá jafnvel í styttra formi. Frumsýningin er fyrir hollvini, félaga og aðra velunnara en aðrir sem hafa áhuga eru velkomnir.“








Fleiri fréttir

Sjá meira


×