Menning

Heillaðist af Guðmundar- og Geirfinnsmálum

Aðalheiður Ámundadóttir skrifar
Breski verðlaunaljósmyndarinn Jack Letham gaf út ljósmyndabókina Sugar Paper Theories, um Guðmundar- og Geirfinnsmál og sýningin hefur að geyma sama efni.
Breski verðlaunaljósmyndarinn Jack Letham gaf út ljósmyndabókina Sugar Paper Theories, um Guðmundar- og Geirfinnsmál og sýningin hefur að geyma sama efni. VÍSIR/VILHELM
Sýning ljósmyndarans Jacks Letham, Mál 214, í Ljósmyndasafni Reykjavíkur verður opnuð klukkan þrjú í dag. Sýningin dregur nafn sitt af málsnúmerinu sem Guðmundar- og Geirfinnsmál fengu í Hæstarétti Íslands (H 214:1978).

„Ljósmyndir geta lýst þessu máli svo vel vegna þess að það snýst um rangtúlkanir, blekkingar og misskilning,“ segir Letham, en hann kom fyrst til Íslands árið 2013 vegna annarra verkefna og heillaðist af þessu dularfulla sakamáli.

Rannsóknarteymi Karls Schütz, ágúst 1976.Jack Letham/Lögreglan
„Ég held að ljósmyndin sé hinn fullkomni miðill fyrir þetta mál, ekki síst vegna þess að svokallað minnisvafaheilkenni kemur við sögu og Það eru ákveðin líkindi með virkni minnis og ljósmynda,“ segir Letham, sem tók snemma þá ákvörðun að mynda ekki hin dæmdu sjálf, en beina frekar sjónum að öðrum persónum og myndefnum.

„Kastljósinu hefur of mikið verið beint að þeim sem voru sakfelld af hálfu lögreglu og fjölmiðla,“ segir Letham og bætir við: „Það er löngu tímabært að færa linsuna af þeim og yfir á rannsóknina sjálfa.“

Keflavík 16.02.77. Ljósmynd úr lögregluskýrslum málsins.
Letham hefur eins og áður sagði kynnst mörgum einstaklingum sem komu við sögu málsins.

„Erla Bolladóttir er með ljóðrænni manneskjum sem ég hef kynnst,“ segir Letham. „Það er eitthvað ljóðrænt við að hún velji að búa í kjallara, gæludýrið hennar sé einmitt það dýr sem myndi lýsa minnisvafaheilkenni best og híbýli þess sé lítið fiskabúr,“ segir Jack, inntur eftir því af hverju gullfiskur Erlu hafi vakið áhuga hans.

Sýningin verður opnuð klukkan 15 í dag en klukkan 14 á morgun, sunnudag, gefst sýningargestum kostur á að hlýða á létt sýningarspjall Lethams og Gísla Guðjónssonar réttarsálfræðings um efni sýningarinnar.






Fleiri fréttir

Sjá meira


×