Lífið

Erna Vala og Þóra Kristín fengu tónlistarnámsstyrk

Sæunn Gísladóttir skrifar
Ernu Völu Arnardóttur og Þóru Kristínu Gunnarsdóttur voru veittir styrkir til framhaldsnáms í píanóleik.
Ernu Völu Arnardóttur og Þóru Kristínu Gunnarsdóttur voru veittir styrkir til framhaldsnáms í píanóleik. Mynd/Aðsend
Þessi styrkur hjálpar manni í rauninni við allt. Það er svo mikilvægt að geta einbeitt sér að náminu í stað þess að þurfa að hafa áhyggjur af peningamálum. Svona styrkur gefur manni líka mörg tækifæri í viðbót því maður getur nýtt peningana í alls konar hluti sem tengjast náminu óbeint, eins og að ferðast til að halda tónleika eða taka námskeið utan skólans,“ segir Erna Vala Arnardóttir píanóleikari.

Þann 20. júlí fengu þær Erna Vala og Þóra Kristín Gunnarsdóttir tveggja milljóna króna styrk hvor til framhaldsnáms í píanóleik úr Minningarsjóði um Birgi Einarson apótekara.

Skömmu eftir að Birgir Einarson lést 30. nóvember 1994 ákvað ekkja hans, frú Anna Einarson, að stofna sjóð til minningar um hann sem hefði það verkefni að styrkja efnilega píanóleikara til framhaldsnáms erlendis. Frá árinu 1999 hafa 26 veglegir styrkir verið veittir úr sjóðnum í þessu skyni og hafa sumir píanóleikaranna hlotið styrki oftar en einu sinni.

Erna Vala hefur undanfarið lagt stund á klassískt píanónám við Listaháskóla Íslands og Síbelíusarakademíuna í Finnlandi og stefnir að því að ljúka meistaranámi frá Síbelíusarakademíunni eftir tvö ár. Einnig hefur hún stundað tónsmíðar og fengið verðlaun fyrir verk sem hún hefur flutt opinberlega.

Þóra Kristín lauk nú í vor meistaraprófi frá háskólanum í Luzern í Sviss í píanóleik og píanókennslu með kammertónlist sem aukafag og hlaut hæstu einkunn fyrir lokatónleikana. Hún mun nú hefja tveggja ára meistaranám í píanókammertónlist og ljóðasamspili við Zürcher Hochschule der Künste í Sviss.

Báðar hafa þær Erna Vala og Þóra Kristín tekið þátt í ótal masterklössum og öðrum tónlistarflutningi og sýnt þar og sannað að þær eiga brýnt erindi í heimi tónlistarinnar.

Styrkveitingin fór fram á heimili formanns stjórnar minningarsjóðsins, Ingu Ástu Hafstein píanókennara. Aðrir í stjórn sjóðsins eru píanóleikararnir Halldór Haraldsson, Anna Þorgrímsdóttir, Ólafur Vignir Albertsson og Snorri Sigfús Birgisson auk Magnúsar B. Einarson læknis. 






Fleiri fréttir

Sjá meira


×