Fótbolti

Stelpurnar okkar ætla að njóta síðustu stundanna á EM

Tómas Þór Þórðarson í Rotterdam skrifar
Landsliðsstelpurnar okkar voru mjög hressar á æfingu í Rotterdam í gær og virðast vera búnar að vinna sig út úr vonbrigðum laugardagsins.
Landsliðsstelpurnar okkar voru mjög hressar á æfingu í Rotterdam í gær og virðast vera búnar að vinna sig út úr vonbrigðum laugardagsins. Vísir/Tom
„Að vera á stórmóti er ekki eitthvað sem gerist á hverjum degi og maður á að njóta þess. Það eru gríðarleg forréttindi að taka þátt í svona stórmóti og því eigum við bara að njóta síðustu daganna.“

Þetta voru lokaorð landsliðsfyrirliðans Söru Bjarkar Gunnarsdóttur á blaðamannafundi íslenska liðsins í Kastalanum í Rotterdam í gær en á þeim velli mæta stelpurnar okkar Austurríki í lokaleik sínum á EM 2017 í fótbolta. Sama hvernig fer í kvöld er íslenska liðið á heimleið og því aðeins stoltið undir.

Fyrirliðinn komst vel að orði. Svekkelsið er auðvitað mikið enda var stefnan að sjálfsögðu sett á að komast upp úr riðlinum. Sá draumur dó í Doetinchem fyrir þremur dögum og nú er bara að komast yfir það og einbeita sér að síðasta leiknum. Það hefur reynst þrautinni þyngri viðurkennir Sara.

Landsliðsþjálfarinn Freyr Alexandersson og Dagný Brynjarsdóttir brosmild á æfingunni í gær.Vísir/Tom
Ætla sér sigur



„Dagurinn á eftir var erfiðastur þegar maður áttaði sig á því að maður var að fara heim eftir mót. Við settum okkur háleit markmið en samt raunhæf finnst mér. Þetta er búið að vera erfitt en við viljum enda þetta mót á sigri og við stelpurnar erum strax byrjaðar að peppa hver aðra upp. Það er komin meiri gleði og við erum byrjum byrjaðar að styðja meira hver við aðra. Við ætlum okkur að vera tilbúnar á morgun og ætlum að vinna,“ segir Sara Björk.

Hún fékk högg í leiknum á móti Sviss og virtist um tíma vera á leið út af en harkaði það af sér og kláraði leikinn. Sara ætlar að leiða íslenska liðið í síðasta sinn út á völlinn á morgun og þó aðeins stoltið sé undir fyrir stelpurnar er það meira en nóg fyrir þær. Þær eru stoltar og vilja gera þjóðina stolta af þeim.

„Andlega standið er, ef ég tala fyrir sjálfa mig, bara fínt. Ég er tilbúin í leikinn á morgun. Þetta er búið að vera erfitt eftir töpin en við viljum ganga frá þessu móti stoltar og með sigur, það er alveg á hreinu. Við munum gera okkar besta á morgun og skilja allt eftir á vellinum,“ segir Sara Björk sem hefur verið í meðhöndlun undanfarna daga.

„Mér líður bara vel. Ég er búin að vera í góðum höndum hjá okkar frábæru sjúkraþjálfurum og er bara í standi en er tilbúin í leikinn. Ég fékk nokkur högg á móti Sviss en það er búið að hlúa vel að mér þannig að mér líður bara vel.“

Ætli Sandra María Jessen fái tækifæri í kvöld?Vísir/Tom
Hversu mikil orka?

Freyr Alexandersson mun væntanlega gera einhverjar breytingar á byrjunarliðinu þrátt fyrir að stefnan sé að vinna leikinn á morgun. Stelpurnar æfðu eftir blaðamannafundinn í gær klukkan korter í sex að staðartíma og þá var enn ekki ljóst hvaða ellefu ganga út á völlinn í kvöld.

„Það er ekki búið að tilkynna byrjunarliðið og ekki heldur búið að ákveða það þannig að það er smá púsluspil. Bæði út frá líkamlegu ástandi og hvernig leikmenn eru stemmdir og hvernig andlegt ástand er á þeim. Við sjáum það endanlega á þeim eftir æfinguna,“ segir Freyr en leikmenn hafa lagt mikið á sig og endurheimtin því erfið.

„Eins og við sáum með Sif Atladóttur þá kláraði hún allar orkubirgðir líkamans á síðustu andartökum leiksins og fékk einnig högg á lærið. Sjúkrateymið er búið að vinna kraftaverk síðustu daga. Allir leikmenn eru leikfærir. Svo er bara spurning hversu mikið er eftir af orku í vöðunum og þá hefur andlegt ástand mikið að segja. Hversu ferskur þú ert í höfðinu til að ná í þá orku sem er til staðar,“ segir Freyr Alexandersson.


Tengdar fréttir

Katrín á toppnum í fötuáskorun UEFA á EM

Landsliðskonurnar Katrín Ásbjörnsdóttir og Ingibjörg Sigurðardóttir voru fulltrúar íslenska landsliðsins í "Bucket challenge" UEFA meðal liðanna sextán sem taka þátt í EM kvenna í fótbolta í Hollandi.

Frábært að þurfa ekki að þrífa upp eftir sig

Ingibjörg Sigurðardóttir fékk blaðamenn á Evrópumótinu til að skella upp úr þegar hún var beðin um að lýsa því hvers hún ætti eftir að sakna að loknu Evrópumótinu.




Fleiri fréttir

Sjá meira


×