Viðskipti innlent

Viðræðuslit að frumkvæði Skeljungs

Kristinn Ingi Jónsson skrifar
Valgeir M. Baldursson, forstjóri Skeljungs.
Valgeir M. Baldursson, forstjóri Skeljungs. vísir/pjetur

„Samningurinn á milli aðila var háður ýmsum skilyrðum og forsendum sem ekki gengu öll eftir og því varð þetta niðurstaðan,“ segir Valgeir M. Baldursson, forstjóri olíufélagsins Skeljungs, um þá ákvörðun stjórnar félagsins að slíta viðræðum um kaup á öllu hlutafé í Basko.

Valgeir segir félögin hafa verið komin nokkuð langt á veg við gerð áreiðanleikakönnunar, en að öðru leyti geti hann ekki tjáð sig um ástæður viðræðuslitanna.

Viðræður á milli forsvarsmanna félaganna hófust í síðari hluta maí. Var áætlað kaupverð, miðað við gefnar forsendur, allt að 2,2 milljarðar króna. Á meðal fyrirvara fyrir kaupunum var að áætlaður rekstrarhagnaður og horfur í rekstri Basko byggði á forsendum sem væru viðunandi að mati Skeljungs.

Basko á rekstrarfélag Tíu ellefu hf., Ísland verslun hf. og Imtex ehf., en undir þessi félög heyra meðal annars 10-11 verslanirnar, verslanir Iceland, kaffihús Dunkin Donuts og hamborgarastaðurinn Bad Boys Burg­ers & Grill.




Fleiri fréttir

Sjá meira