Uxatindar, vöruhönnun og húsgögn

25. mars 2017
skrifar

Í dag er laugardagur og því tilvalið að nýta daginn í að skoða fjölbreyttar sýningar sem HönnunarMars hefur upp á að bjóða  - hér má sjá alla dagskránna.

Glamour ákvað að taka saman nokkrar sýningar í dag sem við ætlum ekki að láta framhjá okkur fara - ef þau hjálpar til í hönnunarúntinum. 




Í Hörpu er samsýning íslenskra hönnuða þar sem má sjá þversnið af því sem er nýjast í íslenskri hönnun og húsgagnaframleiðslu. Sýnendur endurspegla breitt svið, allt frá stórum framleiðendum til sjálfstæðra hönnuða. Á þessari yfirlitssýningu haldast því í hendur falleg hönnun og gott handbragð þar sem hugvit og verkvit er samtvinnað í eitt.

Klukkan 14 í dag þá veitir Ragna Sara Jónsdóttir hjá fyrirtækinu FÓLK smá innsýn inn í þeirra heim sem er áhugavert fyrir hönnunaunnendur. 

Þeir sem taka þátt í sýningunni eru: 
AGUSTAV, Axis, Á. Guðmundsson, Bryndís Bolladóttir, Dögg Design, FÓLK, G.Á. Húsgögn, North Limited, Skata, Sólóhúsgögn, STUDIO BERLINORD, Syrusson hönnunarhús, Zenus og HA Magazine. 


Af bás framleiðslufyrirtækisins FÓLK í Hörpu.

Á sýningunni Dæmisögur: Vöruhönnun á 21. öld á Kjarvalsstöðum er verkefninu Leitin að íslensku postulíni gerð góð skil. Þetta er samstarfsverkefni þeirra Brynhildar Pálsdóttur, hönnuðar, Ólafar Erlu Bjarnadóttur, keramikers og Snæbjörns Guðmundssonar jarðfræðings. Markmið verkefnisins er að leita uppi íslensk jarðefni sem hægt er að umbreyta í postulín.

Í dag klukkan 15 þá ganga þau Brynhildur, Ólöf og Snæbjörn með gestum um sýninguna og leiða þá í gegnum leitina, segja frá því hvert þau hafa farið og hvert þau eru komin í verkefninu hvert með sínu nefi. Gestum er velkomið að spyrja og taka þátt í umræðum um verkefnið.

Forvitnilegt!


Milla Snorrason hefur fengið stúlkur úr Listaháskóla Íslands til liðs við sig sem munu sýna gjörning íklæddar flíkum úr nýjustu línu hönnuðarins - U X A T I N D A R í Safnahúsinu á Hverfisgötu. Gjörningurinn hefst kl 15:00. 

Hönnuður Milla Snorrason, Hilda Gunnarsdóttir, sækir innblástur til Fjallabaks Nyrðra þar sem hún þræddi gönguleiðir síðla sumars 2016 ásamt fjórum vinkonum.

Listneminn Ágústa Gunnarsdóttir var með í för og fékk það hlutverk að skissa upp göngugarpana í hinum ýmsu stellingum og notaði Hilda skissurnar í vinnslu mynsturs línunnar sem kemur í tveimur litum. Innblástur er einnig sóttur í snið 7. áratugarins og má finna gæðaefni eins og dýrindis silkiflauel og skoska ull í línunni.

Nánar um viðburðinn hér.